PAH GKJW 12-08-2018 " Aja Glokro "

AJA GLOKRO

Waosan : 1 Raja - raja 19:1-8

Kathah artikel wonten ing media sosial ingkang nyariosaken bab tiyang ingkang nglalu. Tamtu wonten sababipun kenging menapa tiyang menika nglalu. Saged krana ngraosaken gagal, kuciwa, mboten kiyat nyangga awrating perkawis gesang lan sampun rumaos gesangipun boten wonten ginanipun malih. Kawontenan ingkang mekaten, ndadosaken tiyang boten kepengen nglajengaken gesang lan milih tilar donya lumantar cara nglalu.

Nabi Elia ugi ngadhepi kahanan ingkang awrat. Saderengipun, Nabi Elia nampi kemenangan klawan nabi - nabi Baal. Nalika mimpang nabi Elia nggadhahi pangajeng-ajeng supados umat Israel lan rajanipun saged sami mratobat, nilar brahala, lan nyembah puji mring Gusti. Nanging sedaya punika mboten kalampahan. Raja Akhab taksih mangkotaken manah lan mboten wonten ewah-ewahan ing gesangipun. Ratu Izebel ingkang boten remen kaliyan menapa ingkang dipuntindakaken nabi Elia lajeng ngincin gesangipun. Nabi Elia bakal dipunpejahi. Nabi Elia rumaos ajrih, lajeng ngungsekaken nyawanipun. Sasampunipun dumugi Betsyeba, nabi Elia kendel lan ngegonga. Elia nyuwun pejah dhateng Gusti. Piyambakipun ngraosaken sayah secara fisik ( ay 5a), ugi sayah batosipun.

Gusti Allah lumantar malaekat mboten negaaken Elia. Gusti Allah kersa paring pitulungan kanthi maringaen wekdal Elia kagem ngaso, dhahar lan ngunjuk. Punapa ingkang katindaken dening Gusti Allah maringi kekiyatan saengga nabi Elia saged mlampah lan nglajengaken tugas sadangunipun 40 dinten 40 dalu ngantos gunung Sinai, ing pundi Gusti Alah kersa ngetingalaken dhiri.

Manungsa saged ngraosaken sayah amargi momotan ing manahipun. Raos menika saged ngagosaken manungsa boten nggadhahi pangajeng-ngajeng malih lan boten kepengen nglajengaken gesang. Nanging, kita kedah emut bilih Gusti Allah nresnani lan perduli dhateng gesangipun manungsa. Mila sampun ngantos nglokro. Mangga sami sowan dhumateng Gusti sabab Gusti Allah mboten badhe nilar lan mesthi bakal paring pitulungan dhumateng kita [itha]. 

Sumber : PAH GKJW 12-08-2018.